Die Dubai Afrikaanse Kerk wil die Oase van Lewende Water in die woestyn wees vir jou en jou gesin. Ons doen dit deur spesifieke ruimtes te skep, waarin jy saam met die res van die gemeente, in geloof kan groei, dit kan uitleef, uitdra en geniet.
Ons kom uit verskillende Christelike kerkverbande of denominasies en ons kom ook van verskillende plekke af; uit Suid Afrika asook uit die res van die wêreld. Ons geniet dit om in Afrikaans kerk te hou en saam te aanbid en te kuier.

‘n Moedertaalkerk is een van die geskenke waardeur God nog altyd die evangelie laat gedy het. Dit is vir ons wonderlik om in hierdie Moslem-Arabiese en ander-talige wêreld, God in ons moedertaal te kan aanbid.

Wat ons as gemeentelede in gemeen het:
1. Ons liefde vir God, ons Vader.

2. Ons geloof dat Christus se offer aan die kruis nie net ons sondes weggeneem het nie, maar ons ook ewige toegang gee tot ‘n lewe saam met die Drie-Enige God, nou en vir ewig.

3. Ons belewenis dat die Heilige Gees ons as opstandingsmense gedurig verander en verbeter, om soos Jesus te wees: ‘n liefdevolle, vredevolle, wyse mens wat ruimte skep vir ander om in te lewe.